Empties 3 - منتجات خلصتها

بسم الله الرحمن الرحيم 

صبـاح / مسـاء . . الخير ،
اتمنى تكونون بـ تمام الصحه و العافيه . .

اكثر شي فالحياه يخليني اتاخر و ما انزل التدوينات بسرعه " الكسل " يا اني اكون عيزانه اصور او عيزانه اكتب ، هالتدوينه كتبتها من الشهر اللي طاف و الصور توني الاسبوع اللي طاف اصورها ونسيت اصور منتج وتوني اصوره اي شي بس علشان انزل التدوينه و في بالي كم تدوينه مهمات لازم انزلهم لكم :/ !! وللحين ماجهزتهم بس تقريبا اغلبهم مصورتنهم بس يحتاجون تعديل و كتابة التدوينه 
، ، 

اول شي بتكلم عنه شامبو فتشي تكلمت عن نوعين من قبل وبرجع اكتب الحين عن 3 انواع جربتهم بشكل مبسط . . في وايد بنات ماعجبهم يمكن اختاروا الشامبو الخطاء وانا بقولكم اي واحد اللي حسيت عطاني نتيجه و حبيته مب لازم يناسب الكل 
" طبيعة شعري الفروه دهنيه و نهاية الشعر جاف شوي " 
عطيت كل منتج حقه فالاستخدام علشان احكم عليه 


" هو عباره عن شامبو طبي علاجي وخالي من البرابين و المواد الظاره بالشعر

طريقة استخدامه مثل اي شامبو تحطينه على شعرج تدلكين فيه الشعر و تخلين ف الشعر علشان يستفيد منه مب على طول تغسلينه لانه جي شعرج مابيستفيد شي تخلينه شوي وبعدين تغسلينه "

ببدا من اليمين لي اليسار 
1 - (( لفروة الراس الحساسه و مضاد للقشره و علاجي خالي من السولفات و البرابين << المهم انه مامنه فايده ابدا ماحسيت عطاني اي نتيجه ولا حتى 1٪ ))
2 - (( هذا للشعر الجاف انا شعري دهني ف عادي اللي شعرهم دهني بعد يقدرون يستخدمونه السائل بيكون من داخل اخضر مثل اللون تقريبا اللي برع العلبه

انصح وبشده فيه للي تعاني من القشره و الحكه اللي تتبع القشره 

وايد واييد حلو وبنفس الوقت لاحظت خف التساقط بشكل كبيير في نوع مخصص للتساقط بس للحين ماجربته لونه احمر )) . 

3- شوفوا كيف تشابه العلب بين الثاني والثالث طبعا انا خذيت هذا بالخطاء 

هذا معالج  للشعر الدهني و يتحكم بالدهون يوعد هالشامبو انه يتحكم بالدهون و يبطىء من ظهور الدهون 

انا مثل ماذكرت انه شعري دهني و هذا على كلامهم يتحكم بالدهون انا شفت انه زاد الدهون بشعري و ماشفته تحكم فالدهون !! ابدا ماحبيته ولا برجع اشتريه برجع اشتري بس اللي هو رقم اثنين احلى واحد من بينهم 

سعره 76 درهم 

تلقونه في اغلب الصيدليات اللي تبيع ماركة فيتشي 

 Wild Strawberry Bath Cream & Body Spray

 هذيل الاثنين اول ما ادخل بوتس لا ارادي اخذهم مافيهم شي مميز بس مادري تعودت اخذهم والحين هبيت في شور جل ثاني بصوره لكم قريب ان شاء الله 

 اول واحد ع اليمين ( باث كريم ) بس انا استخدمه كـ شور جل ريحته تخليني اخذه في منه شور جل خذيته مره بس و ما اتذكر كيف كان حلو ولا بس بشكل عام هو جدا رخيص مافيه مزايا يعني لاثبات ريحه ولا شي 

ع اليسار ( سبري )من نفس المجموعه عادي جدا و حتى ريحته عاديه بس بعد مادري ليش دايما اخذهم 

مجربه منهم روايح ثانيه بس ما اتذكر كيف كانوا

من صيدلية بوتس 

Body Spray - Bath & Body Works

بودي سبري متكلمه عنهم قبل العشق " غرام باريس " دايما اشتريه 

الثاني " ماد اباوت يو " ماحبيته وايد بس ريحته زينه يعني جيده بس مابرجع اشتريه 

من اليمين 
1- مزيل ميك اب بيودما للمليون مره اتكلم عنه فالانستغرام يمكن اول مره اتكلم عنه فالمدونه 
اكيد وااايد يتفقون وياي انه حلو بس صراحه سمعت خبر مب حلو عنه انه يسبب تساقط الرموش !
انا رموشي من الله تتساقط ف ما ادري اذا منه ولا لا  

2- بلسم الشعر وايد تكملت عنه فالمدونه وهذا رابط للي حابه تقرا عنه ( هنا ) 

Lansley - Royal Gold Caviar Serum

سيروم كافيار للويه ماعرف شو هالماركه صراحه او وين تنباع ماصورته كامل لانه الغطا عاكس 

المهم . . سيروم كافيار حلو يطري البشره ويعطيها لمعه نضاره طبيعيه بس عادي جدا 

ما حسيت انه شي واو لانه مفعوله مؤقت جدا يعني المفروض سيروم يكون مفعوله احسن من جي و فيه قلتر

بتلقين وحده على يمين ويهج و وحده فاليبهه خخخ

يعني مادري ليش حاطين قلتر يعني ماحبيت هالنقطه ماله داعي القلتر 

هل برجع اشتريه ؟ صراحه لا ماحسيت عطاني مفعول جبار كـ سيروم 

" وللعلم هالسيروم هديه واصلني يعني انا ماشتريته "

Scrub Your Nose - Soap & Glory 

يستخدم كـ سكراب و بنفس الوقت كـ ماسك حلو للرؤوس السوداء في شوي حروره 

فـ بعد ماتغسلينه تحسين بانتعاش حلو انه ينظف المسام بس صراحه كـ سنفره انا اشوف انه في احلى منه و مابرجع اشتريه لانه ابي اجرب اشياء ثانيه 

في كريم ناقص بس اختفت الصوره

وبس هذا كان كل شي فالاخير لاتنسون اتابعون المدونه سوا عن طريق ( المتابعون ) فالصفحه الرئيسيه على اليمين او عن طريقه برنامج bloglovin بعد من الصفحه الرئيسيه على اليمين تقدرون توصلون لصفحتي فالبرنامج  . . اذا عندكم اي استفسار تقدرون تتواصلون وياي عن طريق الايميل او الاسك او كتبولي كومنت اهني 

Leave a Comment Others