فضفضه + مشترياتي من الصيدليه

بسم الله الرحمن الرحيم 

صبـاح / مسـاء . . الخير ،

حبيت اوضح شغله في بداية تدوينة اليوم انه مب كل شي يناسبني راح يناسبج ولا كل شي

مايناسبني ممكن انه مايناسبج احنا كـ بلوقر نكتب راينا الشخصني يعني بناءً على تجربتي 

نوع بشرتي ، مشاكل بشرتي ، إلخ . . . 

فـ اكتب رايي الشخصي عن تجربتي للمنتج ما انقل لكم تجارب غيري و اكيد مثل ما انا لي رايي الشخصي غيري من البلوقرز ممكن مايتفقون وياي على نفس الراي وبعد انتي ممكن ماتتفقين وياي على نفس الراي  . . فـ لما انزل بوست عن منتج و وايد ما يوافقوني الراي انا ما احذف البوست و ارجع انزله برايهم ! لا اخليه لانه بالاخير هذا رايي واذا حصل و ذميت منتج و عطيته فرصه مره ثانيه وعجبني احذف البوست و اكتب فالبوست اليديد ليش حذفته وليش غيرت رايي فالمنتج " اقصد فالانستغرام لاني ما اكتب عن شي فالمدونه وانا مب متأكده  من رايي فالمنتج " طبعا انا ما اخلي البوست السابق اللي ذميته فيه علشان البنات لايتشتتون بين رايين بين ذم و مدح ،، 

( شغله ثانيه بتكلم عنها الميك اب و السكين كير ) 

ظهور حسابات كثيره فالانستغرام وغير الانستغرام للميك اب و العنايه خلانا كل شي نشوفه نبي نشتريه " شفت اليوم روج عند فلانه و شفت بلاشر عند مادري منو و شفت فاونديشن ونكبجر ونبي نشتري نفسه " لاتجبرين نفسج تشترين كل هذا ! اذا انتي ماتحتاجينه 

صرنا ناخذ اشياء مانبيها بس نشتري نشتري ونكود هالشهر الحمدلله ماخذيت ولا شي من الميك اب 

  بس الشهر الياي ترا بشتري في اشيا ابي اشتريها فاللسته << توها تنصحنا مانشتري 

الا على طاري اللسته ترا انا سويت لي نوت اكتب فيه كل اللي ابي اشتريه اول شي لاني نسايه 

 و ثاني شي لانه بس خلاص الفون راح يرجع من الكثر الكبجرات اللي فيه 

و افضل يعني جذي يكون اسهل علي اشوف كل شي فاللسته ابي اشتريه هالشهر مانزلت وايد تدوينات بس الشهر الياي بحاول انزل كذا ريفيو عن كذا منتج حبيتهم وكان المفروض انزلهم من زمان بس ان شاء الله الشهر الياي كل اسبوع بيكون في موضوع و بحاول اتكلم عن منتجات حلوه علشان تستفيدون منها يعني منتجات صج حبيتهم ، 

على طاري حسابات الانستغرام المتخصصه بالميك اب و العنايه  

بعض البنات على بالهم بس كتبت ( بلوقر ) راح تتهايل  عليها المنتجات  << صح تتهايل ولا خخخ المهم تتهايل عليها المنتجات علشان تجربهم 

و ترا اغلب البنات صار هذا تفكيرهم لما يفتحون اكاونتات بالانستغرام ترا والله مايضرني شي انا بس قاعده اتكلم عن هالموضوع لانه الشي ضحكني شفت وحده كاتبه انا بلوقر لماركه من الماركات وهي حتى ماتعدت 1000  متابعه ترا الماركات مايطرشون حق اي احد يجرب يعني اكثر شي ياخذون بلوقرز صج معروفين هم قصدهم انه يطرشون للبلوقر الفلانيه لانه عندها من يتابعها في ناس يتابعونها فـ راح يكسبون اهم فـ يعني لاتروحين تطلبين انا بلوقرز انا بلوقرز لو يبونج راح يطلبون منج بنفسهم لاتخلين روحج مصخره يعني ماتسوا عليج كلها عينات  

و نرجع لموضوعنا الاساسي ، ترا الكلام اللي فوق ابدا ماله شغل باللي بوريكم اياه 

خذيت كذا شغله من الصيدليه حبيت اشارككم فيها ومنها افضفض ادري الحين اكيد سويتو سكيب حق الهذره اللي فوق 

وبس بتشوفون الصور و السلام عليكم 

كنت مقرره اخلص كل الغسولات اللي عندي و بعدين اخذ يداد بس ايدي تحكني ف خذيتهم بحاول اخلص اللي عندي   وبعدين ابلش استخدمهم مابي استخدم مليون غسول بوقت واحد 

خذيت غسولين اللي على اليمين غسول و مقشر بنفس الوقت من نايتروجينا بالقريب فروت ريحته جميييله و الثاني غسول من اورياج

 سائل للاستحمام على قولتهم . .  من دوف  معاه لوفه 

هالاثنين ماخذه منهم من قبل خلصو ف خذيت يداد بتكلم عن كريم جرجنز من ضمن المنتجات اللي خلصتها اما كريم سيلك متكلمه عنه من قبل اهني بالمدونه

محلول عدسات طبي اخر فتره عيوني قامت ماتستحمل المحلول اللي متعوده اسخدمه 

و فعلاً حلو جربته 

 وبس هذا كان كل شي فالاخير لاتنسون اتابعون المدونه سوا عن طريق ( المتابعون ) فالصفحه الرئيسيه على اليمين او عن طريقه برنامج bloglovin بعد من الصفحه الرئيسيه على اليمين تقدرون توصلون لصفحتي فالبرنامج  . . اذا عندكم اي استفسار تقدرون تتواصلون وياي عن طريق الايميل او الاسك او كتبولي كومنت اهني 

 ــــــــــــــــــــــــــــــــــــــــــــــــ

Ask

http://ask.fm/fofti_

Instagram

http://instagram.com/fofti_

For Business Inquiries !

fofti.al@hotmail.com

Leave a Comment Care