Empties 2 || منتجات خلصتها

Hello . !

شخخبآرككم ؟   

بما انه مواضيع المنتجات اللي تخلص مستمره على طول بيكون اكثر من واحد ف لازم يختلف العنوان علشان تفرقون بينهم 

ف هذا افضل عنوان و الارقام هي اللي بتختلف . . لي موضوع سابق لمنتجات مخلصه كان اول موضوع وهذا ثاني موضوع 

. . .

من فتره قعدت اطلع الاشياء اللي صار لها فتره عندي و اخليها جدام عيني علشان استعملها 

طلعت من بينها اشياء ماكنت حابتها و اشياء حابتها و اشيا خلصتها بس نسيت اقطها ف جمعتهم علشان اتكلم عنهم كلهم في بوست واحد 

" Paris amour shower gel & fragrance mist "

- شور جل غرام باريس من باث اند بودي وركس مع انه من نفس المجموعه هو والعطر لاكن روايحهم غير عن بعض احس العطر ريحتها هاديه اكثر . . الشور جل يحتوي على الشيا و فيتامين e 

المجموعه كلها تجنن اكثر من مره اشتريتها ريحتهم جمييله و احب اخذ الحجم الصغير علشان لا امل من المجموعه خصوصا عطر الجسم يخلص مني اسرع من الشور جل بس عطر الجسم ما استخدمه للجسم استخدمه على الملابس 

سعر الشور جل : 30 درهم 

سعر عطر الحسم : 35 درهم 

من محل bath & body works 

من اليمين 

'Pomegranate, Argan & Grapeseed Oil' Skin Quenching Body Lotion "

بودي لوشن كان من ضمن مجموعه خلصتها من زمان بس دايما يطول عندي اللوشن اكثر لاني اتعايز احطه كل يوم
يعني على حسب المزاج المجموعه كان كل شي فيها من الحجم الصغير ريحته جميله وخفيفه
ثبات الريحه نص نص و الترطيب بعد حلو  يحتوي على ارغان و زيت بذور العنب و خالي من البرابين احسه يحطي ملمس حلو  مادري اهني وين هالماركه متوفره انا طلبتها من موقع beauty  تحصلونها بعد في nordstrom  
. . 

" Victoria's Secret Bombshell body lotion "

ثاني بودي لوشن من فكتوريا سكرت 

انا اعششق اعششق شي اسمه فكتوريا سكرت ♥♥♥

خصوصا عطورهم مجربه وايد منهم و ترا مب علشان احب هالمحل بمدحه بصراحه انا صح احب 

 عطورهم احس روايحها هاديه و انثويه تحسين ريحتها نظافه لاكن مع ذلك مب ثابته عطورهم 

عكس هاللوشن ريحته هاديه و ثابته ترطيبه مب عالي لاكن بنفس الوقت حلو ،

هاللوشن كان من ضمن علبه فيها ( عطر كبيره + عطر صغيره + بودي لوشن + شور جل ) 

كل باقي الاشياء خلصتهم من زمان الزمان خخخ بس هذا اللي بقا منهم كلهم بنفس الريحه العطر و اللوشن و الجل 

هاللوشن الحجم الصغير الحجم الكبير يكون داخل غرشه 

ما اعرف كم سعره لانه كان من ضمن مجموعه 

تلقونه في محلات فكتوريا سكرت

. . 

" Hand Food cream "

هاند فود كريم من سوب اند قلوري يحتوي على زبدة الشيا و زيت المكاديميا 

هالكريم احبه وايد ريحته جميييله بس في وايد بنات ماحبوها طبعا هذا راجع لكل وحده وذوقها 

المهم مب اول مره اخذ منه و احبه لانه الايد بسرعه تمتصه مايخلي هالاثر المزعج على الايد 

بنفس الوقت ترطيبه حلو احب اخذه و انا طالعه يت فتره ركنته لمده لما رجعت استخدمه ريحته تغيرت واااايد 

وابدا ابدا ماحبيت الريحه و هذا خلاني اكرهه :) 

اذا رجعت اشتريه ما بشتري الحجم الكبير بشتري الحجم الصغير 

ما اتذكر سعره صراحه تلقونه في بوتس 

من اليمين ، 

 " Pink Grapefruit shower gel "

هالشور جل مب راضي يخلص :) !

المهم . .  شور جل من بودي شوب انا صراحه مب وايد مع بودي شوب خصوصا الشورجل و اللوشنات

اكثر شي احبه عطورهم الصغار ف تعرفون بعد نحن من ندخل محل تحكنا ايدنا على اساس بناخد غرض وبنطلع 

شفته و خذيته ريحته مقبوله اهو ريحت قريب فروت بس صراحه مايازت لي يعني ماحبيت الريحه وايد 

العلبه اووفر كبيره لو كنتي نفسي من النوع اللي يحب يغير كل فتره لاتشترين هالكبر شور جل مليت منه بسرعه 

وخصوصا انه من البدايه ماكنت حابه ريحته كنت احط منه كميات كبيره علشان يخلص وللحين مب راضي يخلص :]

الباقي منه فرغته في علبه ماخذتنها من دايسو 

ما اتذكر كم سعره يمكن 60 يمكن اقل و يمكن اكثر 

من بودي شوب 

. .
 " sweetie pie shower jelly "
هو وظيفته نفس وظيفة الشور جل
رييحته جمييله احسه ريحت حلاوه مادري كيف اوصف لكم ريحته خخخ بس وايد حبيتها
المهم و الاهم اني انا افضل صراحه الجل اكثر من الجيلي
تستخدمينها مثل ماتبين انا قطعتها لقطع صغيره انسي سالفت انج تفركينها على جسمج لانها بتبدا تتقطع قطع صغار
ومابتحسين انج استفدتي منها شي استدخميها مع الليفه
ماحسيتها شي مميز ولا برجع اشتريها
من lush

 " Facial scrub apricot "
سنفرة المشمش هي للويه بس انا استخدمها للجسم ماجربتها ولا مره للويه ف ما اعرف شو نتايجها على الويه اما للجسم انا استخدمها كونها سنفره خفيفه اقدر استخدمها كل يوم عادي لانها خفيفه امم ما احس تعطي نتيجه << محد قالج تخترعين و تستخدمينها للجسم المهم مافيها شي مميز و عاديه اتكلم عن الجسم لاكن البشره ما ادري اذا تعطي مفعول 
مادري كم سعرها من الجمعيه 

من اليمين . . 

 شامبو صانصيلك البرتقالي 

ريحته تجنن علشان جذي خذيته  ندخل فالاهم يت فتره ماخليت شامبو ماجربته :) 

وهذا منهم انا ماحبيته ابدا شعري دهني و هذا الشامبو ابدا مايساعد من اول يوم اغسل فيه شعري احس 

جني مب غاسلتنه ما انكر انه يعطي نعومه للشعر و ريحته حلوه بس ابدا مايناسب البنات اللي شعرهم دهني 

يناسب الشعر الجافه 

ما اعرف كم سعره تلقونه فالجمعيه 

. . 

" Expert Dry shampoo " 

الشامبو الجاف من بوتس في افشل من هالمنتج ! 

ابدا ماحبيته احسه يزيت الشعر مادري ماحبيته حتى ريحته مزعجه 

فاششل جدا من بوتس طبعا على مدح اللي تشتغل في بوتس دايما يطيرون المنتج 

السما و اخر شي مايسوا عندي اياه من زمان استخدمته كذا مره و ماحبيته وركنته 

كريم حمام زيت للشعر خذيته من بنت تبيعه فمنتدى سيدات الامارات من زمان وهالعلبه من زمان ناستنها 
والمنتج مخلصتنه جربت المجموعه كامله بسبب تساقط الشعر 
يخلي الشعر حريييييير هالمنتج ينعممه مب بالقصد انه يخلي شعرج مدى الحياه ناعم =) اقصد لما تحطينه 
هالمجموعه زيت و حمام زيت و شامبو حبيتهم و روايحهم حلوه ويخففون تساقط الشعر بس مجرد انج تتركينه يرجع على حاله يعني لازم على طول تستمرين على المجموعه

من اليمين . . 
مزيل ميك اب سيفورا للعيون حبيته ماحرق عيني او حسسها و تنظيفه وايد حلو اكيد برجع اشتري منه 
ما اتذكر سعره تلقونه في سيفورا 

. . 
غسول " tea tree witch hazel " 
يناسب البشره المختلطه و الدهنيه بالعلبه سائل بس لما تضغطين الضغاط يطلع على شكل رغوه 
كـ غسول للبشره الدهنيه احسه ماينفع تنظيفه ما احس هالتنظيف اللي يحسسج انه نظظف البشره عدل 
خصوصا البشره الدهنيه و المختلطه يحتاجون غسول يشيل طبقة الدهون المتراكمه 
مابرجع اشتريه من بوتس و بعد ما اتذكر سعره 

محلول عدسات سولو كير اكوا ماحبييييته ابدا ابدا ابدا 
فاشل حسس عيوني وللحين ما اقدر البس عدسات لمده طويله و ابدا ما ارتاح للعدسه اذا حطيته هالمحلول 
ترا بنات المحلول له دور اذا حسيتي العدسه تحرقج او ما ارتحتي لها وايد ممكن يكون من المحلول 

وجذي نكون خلصنا 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

Ask

http://ask.fm/fofti_

Instagram

http://instagram.com/fofti_

For Business Inquiries !

fofti.al@hotmail.com

Leave a Comment Care