سي سي كريم سيفورا | | CC Cream Sephora

Wednesday, March 22, 2017
بسم الله الرحمن الرحيم 
صبـاح / مسـاء . . الخير ،

؛ اتمنى تكونون  في تمام الصحه و العافيه ؛ 

CC CARE + COLOR


هالمنتج نزل من فتره طويله و انا استخدمته من فتره طويله بس توني اتذكر انزل عنه
فالفتره الاخيره قمت ادور شي اخف من الفاونديشن و للأمانه كنت ابغي نوع ثاني 
بس كان دايماً مخلص و الموظفه اللي في سيفورا مدحته لي وقالت لي صدقيني مابتندمين 
طبعاً انا مالقيت اللي في بالي ف قررت اخذ هذا مع اني ماكنت مقتنعه ولا حتى 1٪ 
😅😅
فالنهايه قتلها اوكي عطيني اياه وسألت عن الدرجات 
بالعاده او المتعارف عليه انه يكون في اكثر من درجه او على الاقل 3 درجات 
هذا مافي مجال للاختيار ف توقعت انه ماراح يناسبني !! 

مالكم بالطويله 😏
السي سي كريم هذا لو تلاحظون عباره عن لونين مرطب ولون جدا خفيف بمجرد 
ماتحطينه على بشرتج تحسينه ياخذ نفس لونج جداا خفييف 
من مواصفاته يقلل من العيوب و الاحمرار و أكثر شي لاحظته يعطي اشراقه صحيه و جميله للبشره 
وايضا يحتوي على حمايه من الشمس " SPF 20 " 


مايناسب اصحاب البشره اللي فيها وايد مشاكل صحيح اني قلت يقلل العيوب لاكن مايخفيها بشكل كامل و خصوصا اللي عندها حبوب ابدا مابيناسبها
و ابدا مابيتقبلونه اللي يحبون الفاونديشن الثقييييل لانه جدا خفيف كأنه مافي شي على البشره  
حبيتها حق الطلعات الخفيفه اللي ماتحتاج فاونديشن 


/ / 
:: رايي فالمنتج ::
ممتاز جدا للطلعات السريعه و الخفيفه ماتحسين انه في شي على البشره
جدا خفيف و تحسين انه بشرتج تتنفس 
كنت من الناس اللي في كل مشوار احط فاونديشن بس ولله الحمد المنتج هذا اغناني 
عن الفاونديشن لانه خفيف ومريح اكثر 
بالنسبه لي ابدا مايناسب المناسبات لانه خفيييييف وايد وايد خفيف 

سعره 85 درهم اماراتي 
من سيفورا 

بروتين شيك \\ The Slender Blend Protein

Thursday, January 26, 2017
بسم الله الرحمن الرحيم 
صبـاح / مسـاء . . الخير ،
؛ اتمنى تكونون  في تمام الصحه و العافيه ؛ 


قبل فتره نهاية السنه اللي فاتت قلت بكتب لكم طريقتي في تحضير البروتين شيك 
و مع اني مصوره وكل شي جاهز بس نسيت 😬



سبق وتكلمت بشكل تفصيلي عن البروتين هذا تقدرون تستخدمون اي بروتين عادي 
انا اسوي سموثي بروتين لان ماحب طعم البروتين 
طبعا هذي طريقتي القديمه و الحين غيرتها بكتب طريقتي القديمه اللي على اساسها صورة التدوينه و الطريقه الجديده في تغير بسيييط ، 


كل اللي تحتاجونه 
- بروتين اي نوع انتو تحبونه " الكميه على حسب احتياجكم "
- حليب اي نوع تحبونه و الكميه اللي تبونها
- 4 او 5 حبات فراوله 
- 1 موز 
- اناناس " اختياري " الطعم يطلع رهييييب مع الاناناس
- ملعقة عسل " العسل اللي فالصوره من ايهرب احبه وايد حلوو اكثر من مره طلبته 
- مكعبات ثلج 

" الطريقه "


احط كل شي بالخلاط و يطل الناتج سموثي بروتيني لذيذ جدا طبعاً السعرات بتكون عاليه لان فيه فواكه وحليب وعسل



الطريقه الثانيه نفس الاولى بس بدل لا احط ملعقة عسل احط ملعقة بينت بتر وايت جوكلت



وبس 

😍💜



مشترياتي + تجربتي للأكل الكوري

Thursday, January 5, 2017
بسم الله الرحمن الرحيم 
صبـاح / مسـاء . . الخير ،
؛ اتمنى تكونون  في تمام الصحه و العافيه ؛ 


صارلي فتره طويله بخاطري اجرب الجاجانغ ميون و الدكبوكي الكوري
دورت على موقع يكون فيه كل اللي ابغيه بدل لا اطلب من كل موقع بروحه
لان لقيت كل منتج ابغيه بس ف موقع مختلف هالموقع الوحيد اللي لقيته وفيه اللي ابغيه بالضبط


تحمست وطلبت اكثر من شي ، الحلو فالموقع مب بس اكل كوري في بعد ياباني و اتوقع صيني 


الجاجانغ ميون عباره عن معكرونة فول الصويا طبعا من اكثر الاشياء اللي كان ودي اجربها 
طعمها مش سيء لاكن من الاشياء اللي مابرجع اجربها معلبه بس اذا زرت كوريا بجربها ان شاء الله 
جيده لاكن ماتستلذين وانتي تاكلينها ! 


كعك الأرز .. دايما اشوفه فالمسلسلات و احسسه لذيذ اول مابطلت العلبه ! 
شكله مايشهي خخخخ حتى بعد ما جهزته ماتحمست اجربه ،، 
ماعجبني صراحه ابدا 

" طريقة تحضيره  "



بسكوت اعواد " ياباني " يذكرني بتبع لوته الكوري اللي كرتونه اخضر هذاك لذيييذ بششكل يجننن 
لكن هذا كان عادي جيد " يمشي حاله يعني "  


شبس دكبوكي بعد ماحبيت " مافيه طعم !"  كأني اكل بس سكر 


براوني صراحه ماجربته 

، ، ، 

بشكل عام اكتشفت انه الاكل الكوري غيير محبب لـ قلبي عكس مسلسلاتهم الجميله 
طبعا اكيد هذا يرجع لـ ذوق الشخص يمكن غيري جرب هالاشياء و حبها 
كنت مفكره احط رابط الموقع بس بما انه ماحبيت الاشياء فـ ماله داعي 




review scivation xtend BCAA | | ريفيو : أحماض امينيه من شركة اكس تيند

Sunday, November 6, 2016
بسم الله الرحمن الرحيم 
صبـاح / مسـاء . . الخير ،
؛ اتمنى تكونون  في تمام الصحه و العافيه ؛ 


Scivation Xtend BCAA


الـ BCAA هي سلسلة احماض امينيه تتكون من 3 احماض امينيه اساسيه 
و هي : الليوسين و الايزو ليوسين و الفالين . 
و " معنى احماض امينيه اساسيه " ان الجسم مايقدر ينتجها بداخله و يحتاج لها من مصادر خارجيه .

؛ 

هذا المكمل الغذائي من المكملات الاساسيه و من فوايده
- يساعد على نمو العضلات " يخفض عملية الهدم و يزيد من عملية البناء " .
- يساعد على استشفاء العضله .
- يقلل التعب و الارهاق وقت التمرين .



من مميزات هذا الـ BCAA : 
- خالي من السعرات الحراريه . 
- خالي من السكر . 
- خالي من الكربوهيدرات . 

متى يستخدم ؟ 
قبل او بعد او اثناء التمرين  



اول ما اشتريته عبالي مافيه المغرفه فـ كنت استخدم مال البروتين لان عندي زياده 
مع الاستخدام اكتشفت انه في وحده فالعلبه داخل .  


صراحه اول ما قررت اطلب احترت من اي براند اطلب كنت محتاره بينه و بين شركه ثانيه
تقيم الناس كان عالي فالموقع و قررت اطلبه بعدها احترت بين النكهات و طلبت النكهه اللي انا احبها وللأمانه كنت متخوفه من الطعم 
حبيته لذيذ كأنه عصير ! 
يعني مافيه طعم غريب و متحمسه اجرب نكهة المانجو عليها بعد تقيم عالي 

هل انصح بهذي الشركه ؟ 
نعم ، انصحكم و بشده فيها 


لاتنسون تشتركون فالمدونه ونلقاكم ان شاء الله في تدوينات صحيه اكثر قريبا 
مع السلامه 

protein world slender blend / / بروتين ورلد سليندر بليند

Monday, October 31, 2016
بسم الله الرحمن الرحيم 
صبـاح / مسـاء . . الخير ،
؛ اتمنى تكونون  في تمام الصحه و العافيه ؛ 



قبل فتره طويله طلبت من موقع بروتين ورلد 
بحثت عنه وايد ابدا مالقيت اي شي عنه بالعربي او بشكل اوضضح مافي عرب تكلموا عنه 
و حاليا انا طلبت منه علبه ثانيه " نكهه يديده كانت نازله " 
 بصورلكم المنتج اللي عندي من زمان و اللي طلبته الشهر اللي طاف نفس المنتج بس نكهه يديده  
هذا اول بروتين اجربه ماقد جربت نوع ثاني و كنت محتاره بينه و بين نوع ثاني 
ان شاء الله بعد ما اخلص هالنوع بجرب النوع اللي كان في بالي 

. . . 


عن طريق الصدفه كنت ابحث عن بروتين ف هذا اللي لقيته 
و اكثر شي جذبني اللون الاصفر " انا من محبين اللون الاصفر " 
انا صراحه فالبدايه ماكانت عندي خبره و كنت ابحث عن بروتين للبنات 
اذا كنتي شراتي تدورين عن بروتين للبنات ترا مافي شي اسمه بروتين للبنات 
و بروتين للشباب البروتين بروتين خخخخ << مادري واضحه يعني ولا 
و البروتينات ايضا في انواع وايد في للي بيزيد وزنه و في للي بينزل وزنه وغيره 
اول ماقلت بشتري بروتين وسألت الناس اللي حواليني < ناس ماعندهم خبره ابدا بالرياضه و المكملات الغذائيه قالو لي لا و هذا مضر و هذا ريحته خايسه و هذا يأثر على الكبد و تأليف لي باجر !
انا اقولكم اذا عندكم نيه تبدون تسون رياضه و فعليا محتاجين هالمكملات طبعا نحن مانتكلم عن مثلا بس مشي او اللي طايحين فيها البنات هاليومين بس تسوي سكوات او مثلا بس تسون اليوم و عشره لا . 
 انا اتكلم اذا عندكم نيه تغيرون من نفسكم فعليا لان المكملات الغذائيه تعتبر مكلفه ف ماله داعي تشترون وتخلونه لي مايخترب ولا له داعي انكم تشترون اذا انتو مب ملتزمين بنمط حياه معين و ترا المكملات الغذائيه مب سحر يعني اذا ماكان في مجهود منكم انسو تلقون نتيجه . 

؛

- هل المكمل الغذائي مهم ؟ 
لا ، اسمه مكمل غذائي يعني اذا كنتوا تاكلون عدل و تكملون كل احتياجاتكم بالاكل ماله داعي . 

- شو المكمل الغذائي المهم اللي لازم اخذه ؟ 
انتوا تحددون شو محتاجين اشوف وايد بنات توها يعني بتشد حيلها تسير محلات المكملات الغذائيه 
وتاخذ مجموعه من بروتين من فيتامينات من حارق للدهون .. إلخ 
ترا ماتحتاجون هذا كله والله ! 
لا وبالنهايه ماتدري هذا شيسوي اصلا بس تبلع 
ضروري تقرون عن كل مكمل تفكرون تشترونه و تقرون الناس شو كاتبين عنه اذا مالقيتو في مواقع ثانيه بتلقون تحت المنتج فيه ناس كاتبين رايهم فالمنتج لاتاخذون شي ماتعرفون عنه ولا شي !! 

- اذا انا متينـ / ــه عادي اخذ بروتين ؟ 
اكيد عادي بس ضروري يكون عندكم هدف زيادة عضل مثلا او نزول الوزن .

تنبيه : ارجع اعيد اي مكمل غذائي مفكرين تاخذونه اقرو عنه لاتخلون حد يقص عليكم او يقولكم خذو هذا وهذا وهذا و كل هالاشياء مثلا ماتحتاجونها اذا بتاخذون نصيحه يا تاخذونها من شخص صاحب خبره او شي تكونون قارين و متأكدين انه مناسب لكم اما بعض اصحاب المحلات يسوقون لكم المنتج 
و هم مب هامنهم كيف ممكن يأثر عليك . 



Protein World


اول مره قررت اطلب هالبروتين احترت صراحه بين النكهات و قريت راي الناس اللي مجربينه 
حسيت اكثر وحده ممكن تناسبني على حسب تقيم الناس " الفانيلا " 
طلبته عن طريق الموقع يعني بدون وسيط ولا شي اخترت الشرق الاوسط و بالتحديد الامارات 
وسجلت فالموقع طريقة الطلب سهله للي مايعرفون بنزل الطريقه . 
وللعلم هالمنتج فيه مجموعه كامله و في منفصل بس البروتين انا بس خذيت البروتين .



اول خطوه : تدخلون الموقع على اليسار فوق تضغطون و تطلع لكم خريطه بهالشكل
 تختارون الـ Middle East 
وبعدها دولتكم 



ثاني خطوه : التسجيل فالموقع جدا سهل مافيه اي شي يديد او غريب او يحتاج الشرح ! 
في طرق ثانيه للتسجيل فالموقع عن طريق فيس بوك او تويتر 
و تضغطون على Register 




بعد ماخلصتو تسجلون على اليمين بتلقون رمز " قلب " و رمز " الجنطه " 
رمز القلب هو المكان المخصص اللي تقدرون تدخلون اكاونتكم منه تحطون الايميل و الباسورد و اذا كنتو مسجلين بالفيس بوك او تويتر او قوقل بس تضغطون عليهم من تحت وتسجلين الدخول 




ثالث خطوه : اختيار المنتج المناسب مثلا انا طلبت هذا المنتج انا ما ابغي ازيد وزني ف خذيت هالنوع 
اضيفه لحقيبة التسوق 


+ اذا ماعندكم الشيكر لاتنسون تضيفونه لسلتكم 
الخطوه الرابعه : proceed to checkout


 لاتنسون تسون سيرج على كوبون خصم اذا لقيتو حطوه في هالخانه و ضغطو على Apply 


خامس خطوه : و هي الخطوه الاهم و لازم البيانات فيها تكون صحيحه 100 ٪ 
طبعا انا لان طالبه من قبل فالعنوان موجود بس اللي اول مره يضغطون على new address



الخطوه السادسه : الدفع 



" رسوم الشحن " 
مبلغ الشحن من وجهة نظري يعتبر رمزي 8 دولار فقط 
تقريبا 29 درهم اماراتي من لندن إلى الامارات 
و يوصل على البيت < انا وصلني على البيت عن طريق شركة DHL 
ياخذ تقريبا اسبوع او 10 ايام 
 اخر شي بيطلع لكم المبلغ الاجمالي سعر المنتجات اللي طلبتوها مع سعر الشحن انا نسيت احط اختيار الشحن 
عشان جذي مابين سعر الشحن اللي هو 8 دولار 
اخر خطوه : تضغطون Place Order 
طبعا بيوصلكم ايميل بعد ماتطلبون يخبرونكم انهم بيطرشون لكم ايميل بالتراك نمبر وغيره من المعلومات الخاصه بالطلب  


اتوقع مافي اسهل من جذي ! 

رابط الموقع للي حابين يطلبون 

https://www.proteinworld.com



 THE SLENDER BLEND - VANILLA



هذا المنتج الاعلى مبيعاً فالموقع انا خذيت نكهة الفانيلا عالي بالبروتين و قليل السعرات 
اول استخدام لي لهذا المنتج كانت فقط اضافة ماء 
ريحته وايد حلوه لاكن الطعم ! جدا ً سيء هههههه ! 
طبعا اكيد بتقولون عيل ليش تعبتي روحج و حطيتي طريقة الطلب وجذي . . 

فكرت كيف استخدمه و الحل الاخير كان اني اسوي فيه سموثي حبيته جداا
و بطل كان الطعم و حاليا كل يوم استخدمه 
تقدرون تسون فيه بعد وصفات و احلى شي معاه يطرشون كتاب فيه وصفات 
ما اقدر اقول عن هالمنتج سيء او في افضل منه لان هذا النوع هو اول نوع اجربه 
ويعتبر ممتاز بالنسبه لي بس بعد ما اجرب انواع ثانيه اكيد بقدر اقارن بينهم 



" مع البروتين في مغرفه "


بعد فتره نزلو نكهه يديده " Salted Caramel
طبعا انا لان وايد احب الكراميل على طول طلبته 

؛ 
" المنتج " 
 - خالي من الغلوتين
 - خالي من الصويا
 - نباتي
- مناسب لمرضى السكر 
- حلال 


اكثر شي حبيته انهم يطرشون كتاب ويا المنتج لبعض الوصفات 

اول مره طلبت وصلني هالكتاب 



 احلى شي فيه انه فيها خطه توضح لكم شو تاكلون طول اليوم لمدة اسبوع



اهني سويت هالطريقه انا بس ماي و البروتين و ذكرت انه ماعجبني بهالطريقه بس مع السموثي جدا بطل 


في وصفات سموثي كثيره مب شرط تلتزمون فيها طبعا 


وفي وصفات وجبات صراحه ماجربت منهم شي لاكن يعتبر شي حلو 


 و اخر شي فيه بعد رد على بعض الاسئله اللي ممكن تكون على بالكم 


ثاني كتاب وصلني مع ثاني طلبيه كان مختلف نوعاً ما . . . 
حبيته اكثر موضحين لكم شو تاكلون خلال اليوم و بعد فيه تمارين





ان شاء الله بنزل قريب طريقة السموثي اللي اسويها في تدوينه منفصله 
اذا عجبتكم التدوينه لاتنسون تشتركون فالمدونه علشان يوصلكم كل يديد 
و اذا عندكم اي  سؤال تقدرون تكتبون فالكومينت 


Top