Clinique Anti-Blemish Solutions | | البشره الدهنيه

بسم الله الرحمن الرحيم 

صبـاح / مسـاء . . الخير ،

؛ اتمنى تكونون  في تمام الصحه و العافيه ؛ 

 هذي التدوينه حاليا اكتبها و انا مادري وين بوصل فيها او شو اللي بوصله 

او هل ممكن تفيدكم او لا بس اتمنى تفيد البعض ولو بمعلومه بسيطه
ما اقول اني افضل منكم حتى انا مثلكم في اشياء ما اعرفها اخذها او اقراها من اماكن ثانيه
مادري من وين ابدا لان هالموضوع جدا كبير يعني لو اتكلم فيه من اليوم لـ باجر مابخلص و مختلف من شخص لـ شخص
وبالنهايه محد يفهم فيه غير المتخصصين فيه 

" حب الشباب " 

حب الشباب مرض جلدي تهيجي أو التهابي ، ناتج عن تغييرات في المسامات الجلدية والغدد الدهنية ، فالإفراز المفرط للزيوت من الغدد بالإضافة إلى وجود طبقة طبيعية من الخلايا الجلدية الميتة يسد المسامات. فـ تتجمع الإفرازات الدهنية تحت المسامة المسدودة ، مما يوفر بيئة ممتازة للبكتيريا للتكاثر والنشاط . وبالتالي يتهيج الجلد ، منشئاً منطقة متأذية. يظهر حب الشباب عادة على الوجه، الكتفين، الظهر وأعلى الذراعين .

في مسببات كثيره لحب الشباب : 

مثل الجينات ، الهرمونات و نمط الحياه . .  إلخ 

. .  

قبل سنه تقريبا كنت اعاني من حب الشباب و حالي حال اي بنت ماخليت منتج ما استخدمته 

 على امل انه يروح بدون لا ألجاء لحبوب الروكتان و غيرها من العلاجات الطبيه ! 

طبعا كلنا عارفين انه حب الشباب مايروح بسهوله و من الضروري انج تزورين دكتوره جلديه 

الخطاء اللي انا طحت فيه و غيري من البنات وايد يسون نفس اللي انا سويته ! 

يجربون بروحهم منتجات مايدرون كيف بتكون ردت فعل البشره من هذا المنتج وللعلم المعلومه اللي عرفتها انه المفروض ماتستخدمين منتجات تنشف البشره زياده عن اللزوم لان البشره بتفرز دهون اكثر من قبل وهذا اللي صار وياي انا مابذكر اسم ماركات صراحه لاني جربت وايد وتكلمت من قبل عن وايد بس بتكلم بشكل عام 

في ماركات ينزلون مجموعه للبشره الدهنيه او البشره اللي فيها حبوب وهالمنتجات تنشف البشره وايد 

و هذا الشي جدا خطاء صحيح انج لازم تزيلين الدهون اللي تتراكم على البشره ولاكن بالطريقه الصحيحه مع اختيار المنتج الصحيح .

مجموعة عنايه مخصصه لـ نوعية بشرتج بشرط انه ماينشف بشرتج بزياده مع ذلك صحيح بشرتج دهنيه و تفرز دهون وبتقولين خلاص مابحط مرطب بس خطاء خطاء خطاء لازم تترطب البشره الدهنيه 

بس المرطب تتأكدين انه مايكون دهني لو تلاحظين المرطبات تبع البشره الجافه تكون ثقيله اكثر عشان تعطي ترطيب قوي للبشره الجافه .. البشره الدهنيه ماتحتاج هالنوع من المرطبات تبتعدين عنهم نهائيا في مرطبات مخصصه للبشره الدهنيه يكون قوامها مائي اكثر 

. . . 

بتكلم عن حالتي اكثر و الطرق اللي حاولة فيها اني اتخلص من الحبوب 

انا ماعرف صراحه السبب بالضبط ! 

فـ ما اقدر احكم على شي معين يكون سبب الحبوب اللي طلعت لي ممكن تكون وايد عوامل 

ادت لنفس النتيجه فالوقت نفسه فالاسباب اللي في بالي بذكر بعضها مع اني ماعندي 

سبب معين 

- حف الوجه " سواء بالخيط او الشمع "

- فاونديشن 

- نمط حياه سيء

- تلخبط هرمونات 

في وايد اسباب مثل ماقتلكم ممكن تسبب حب الشباب بس هذي الاشياء اللي حطيتها في بالي 

حالتي ماكانت سيئه جدا يعني حبوب بسيطه مش اللي تكون وايد كبار في ناس يكون عندهم بزياده الحبوب كبار
طبعا مايحتاج اقولكم كيف البشره يطلع شكلها مع الحبوب جدا سيء مهما لطختي ويهج بالفاونديشن
مهما حطيتي فل كفر بتمسحينه فالنهايه ، مابتيلسين جدام اهلج بالفاونديشن 24 ساعه 
مابتنامين بالفاونديشن !
و طبعا ما يحتاي اقولكم كيف حب الشباب ممكن يأثر على النفسيه ! 
والله كنت وايد اتضايق اذا شفت ويهي 
. . . 

اكثر البشرات المعرضه لـ حب الشباب هي البشرات الدهنيه و هالنوع بالذات يحتاج اهتمام كبير
حتى لو كانت بشرتج دهنيه و ماعندج حبوب اهتمي فـ بشرتج قبل لاتطلع لج حبوب وتتوهقين
لاتستخدمين ميك اب ممكن يضر بشرتج لاتتعودين على الفل كفر لانه بيعدم بشرتج 
انا وياج انه مب حابه تطلعين جدام الناس و بشرتج كلها حبوب دوري الحل و ابدي فيه لاتترين الاسوء 
و طبعا ماننسى المقوله الشهيره مادري هي مقوله ولا شو خخخ 
" الوقايه خير من العلاج "

البشره تفرز دهون فـ انتي بدورج لازم تنظفين هالدهون و الاوساخ المتراكمه على البشره و الزيوان و الرؤوس السودا المتراكمه على الانف شي جدا مقرف انج تشوفين بنت عندها زيوان و رؤوس سودا بشكل كبير
لاتقولين ميزانيتي ماتسمح اسوي تنظيف بشره ! عادي في بدائل ارخص لصقات الانف بتقولين لي تزيد الرؤوس السودا !
انا عني اشوف تزيد الرؤوس السودا ولا انج تخلينها !!
في ماسكات تنظيف رخيصه و ممتازه  و ممكن بعد تشترين فرشة تنظيف البشره 
في وايد حلول بس اتعبي و دوري بنفسج ماشاء الله البلوقر شكثرهم وماتطلعين من مدونه الا وانتي مستفيده منها 
حتى لو بشي واحد وانا من الناس اللي استدفت من وايد منتجات نزلوها بلوقر 

سبق و قلت بشرتي كانت دهنيه وكان عندي حبوب و بنفس الوقت عندي مناطق بسيطه جافه      
 اكثر المنتجات اللي تنباع فالسوق للبشره الدهنيه تجفف الويه هالنقطه ماكنت احبها بس كنت مضطره << ماكنت اعرف الطريقه المناسبه اللي المفروض انا اسويها وانا كنت جدا متأزمه من ويهي فـ قمت امشي و اجرب طبعا ماكانت حالتي اصعب حاله ف ما قررت اخذ الروكتان 

لانه دايما الدكاتره يقولون هذا اخر حل ممكن انتي تلجئين له لانه وايد له سلبيات او اضرار 

يعني ابدا لاتستهينون بالموضوع وعلى طول تاخذون الروكتان كنتي بنت او ولد اخذيه وانتي متأكده انه فعليا هذا اخر حل انا والله شكثر جربت اشياء ما خذيته على طول 
لا يغشونكم هاللي طالعين توهم ف سناب تطلع لها حبه وحده وتركض تاخذ روكتان !! 
غلط ممكن تضرين نفسج بهالحبوب بتكلم لكم عنهم اكثر في تدوينه منفصله لان هالتدوينه وايد طويله 

المهم

استخدمت مجموعات كثيره من الجمعيه من غسول وغيره للبشره الدهنيه و لـ حب الشباب 

لو تلاحظون بعد في تدوينه سابقه بتلقونها فالمدونه صارلي فتره منزلتنها تكلمت عن وايد منتجات جربتها في منها اللي ساعدني و في منها اللي ماعطاني نتيجه و في منها اللي عطاني نتيجه سلبيه 

:: طرق علاج جربتها ::

(1)

من قبل سنتين او ثلاث مب متذكره بالضبط كم  تقريبا وهي اول فتره بدت تطلع لي فيها حبوب سرت المستشفى و عطوني حبوب مش حبوب الروكتان ! شي ثاني ماعرف اسمه صراحه والحبوب عقيتهم من زمان ف مااتذكر عنهم شي و كان مالهم ضرر كبير مثل الروكتان و من ضمن العلاج   لوشن" مضاد " 

اول تجربه كانت لي و انا كنت توني ماعرف كيف اتصرف صراحه لاني مب متعوده على بشره فيها حبوب صحيح كانت دهنيه بس بدون حبوب 
ما استمريت فالعلاج لانه الحبوب كانت تسبب لي دوخه يعني الحبوب كانت قويه وايد علي ما استحملتهم و اللوشن اتوقع كان يجفف ويهي  اذا حطيت اي شي بعده يحرقني هذي اول محاوله لي بعلاج الحبوب و كانت فاشله  يعني لاقدرت استمر على الحبوب ولا اللوشن 
ممكن الدكتوره كانت ماتفهم لانه يعني ماشفتها سوت شي بس جذي يالله خذي هذا الدوا هذا حطي جذي وخلاص !
ف من الاشياء اللي لازم تنتبهون لها تسيرون للدكتور المناسب واللي له سمعه جيده 
انا سرت لدكتوره ماعرفها يعني ماسمعت عنها من قبل اللهم يالله بتعالج وانتهى الموضوع ..

(2)

بعدها بديت استخدم صابونة الكركم سبق و تكلمت عنها فالانستغرام للامانه حلوه تجفف الحبوب بس بنفس الوقت تجفف الويه يعني لازم لازم بعدها ترطيبب و صراحه مليت يعني مابقعد طول عمري استخدم صابونه 

واحيانا كنت ما احصلها بس كنت اكلم الصيدلاني واتساب علشان يوفرها لي !!
انزين باجر مثلا قطعوها شسوي انا ؟!

(3)

بعدها بديت اجرب غسولات وغيره فتره طويله وانا بس اجرب طبعا مب كل يوم غسول 

لا استمر عليه فتره علشان اعرف هل فعلا حلو ولا لا ونفس الشي كل هالاشيا كانت حل مؤقت 
بعدها الصيدلاني نصح ربيعتي بمنتجات و بدينا نستخدمهم
 العلاج كان المفروض بس ينحط على الحبه 

ونحن كنا ندهن فيه ويوهنا 

ويهي طبعا صار يحرقني و قطعته ولا كنت قادره احط اي شي في ويهي !! 
لانه كانت طريقة استخدامنا للمنتجات غلط ! و من الغلط اني اخذ بس على كلام صيدلاني وهو حتى مايعرف شي عن بشرتي 
بعدها رجعت على الغسولات و غيره اللي استخدمهم

للعلم ربيعتي بعد عندها نفس المشكله وانا وياها ندور حلول خخخخ ! 
بعدها ربيعتي نفسها اللي قالت لي اجرب المنتجات اللي مدحهم الصيدلاني سافرت مصر و جربت علاج
في مصر ونفع نوعا ما وياها فـ يابت لي الصابون اللي استخدمته من هناك و بديت اجرب ! 
مانفع وياي و اهي رجعت بشرتها مثل ماكانت وهذي حالتنا نحن :(

(4)
بعدها وحده من البلوقر اللي اعرفهم عن طريق الانستغرام جربت منتجات بعد للحبوب 
وكانت متكلمه عن تجربتها مع هالمنتجات
هي مجموعه معروفه جدا نصحت ربيعتي فيها انا ماجربتها لان كانت عندي مناسبه جدا مهمه وما اقدر 
اجازف مافي مجال انه بشرتي تسوء اكثر في هالفتره فـ قلت بعد هالمناسبه اجرب ونشوف 
طبعا اللي صار انه بشرت ربيعتي تهيجت من هالمنتجات و صارت حممممرا و بشرتها تحرقها 
مع ذلك تمت كذا يوم يعني صامده قالت يمكن شي عادي بعدين بدا يزيد و ماقدرت تتحمله 
مع العلم انه هالمنتجات نفعت وايد ناس نحن مانقدر نذم منتجات معينه لانها ماناسبت شخص واحد 


(5)
 اخر شي قررت اسويه استخدم مجموعة كلينك 
لـ حب الشباب المجموعه لونها ازرق كنت مقرره اطلبها من موقع نوردستروم و اخترت الاشيا 

بس قبل لا اطلبهم مرت اخوي ماقصرت يزاها الله خير يابتهم لي مجموعه اللي تكون بالاحجام الصغيره 
صراحه استانست عليهم بدل لا اطلب احجام كبيره ويطيحون في جبدي 
و اللي خلاني احب هالماركه بعد ماجربت هالمنتجات صراحه 


 Clinique Anti-Blemish Solutions

المجموعه مخصصه للبشره اللي تعاني من عيوب تحتوي المجموعه على
- غسول جل مطهر للبشره 
- مقشر 
-  علاج للعيوب 
- فاونديشن " للتجربه " 
- جنطه للميك اب 

اكيد كلكم عارفين انه كلينيك عندها مجموعات ثانيه نفس الشي اللي هي 3 خطوات
لكل نوع بشره مجموعه معينه وهذي وحده من المجموعات وفي مجموعه اسمها 
Acne Solutions مادري شالفرق من بينها وبين هذي صراحه وهم نفس اللون 


 step 1 : cleanse with anti-blemish solutions cleansing gel 

الخطوه الاولى جل مطهر للبشره و المسام يساعد على التحكم بالدهون فالبشره و ايضا تقدرين تستخدمينه على الجسم 
طريقة الاستخدام : طبعا البشره ضروري تكون مغسله بالماي بمعنى اخر نظيفه 
تبللين الايد بالماي و تدعكين المنتج في كف اليد لين تطلع الرغوه تقدرين تضيفين شوي ماي عشان تزيدين الرغوه تدلكينه على بشره رطبه وبعده تشطفينه . " مرتين فاليوم "


step 2 : renew with anti-blemish solutions clarifying lotion

الخطوه الثانيه لوشن مجدد و مكافح لعيوب البشره عباره عن محلول لطيف و فعال لتقشير البشره بشكل جدا خفيف  


step 3 : hydrate with anti-blemish solutions all-over clearing treatment

الخطوه الثالثه علاج للبشره 
تركيبته خاليه من الزيوت تساعد في علاج العيوب الموجوده و منع ظهور البقع في المستقبل 
يخلق حاجز غير مرئي ضد العوامل المسببه للعيب . 
" يقلل الجفاف و التقشير "

:: رايي فالمجموعه ::

حبيت الغسول لانه ماينشف البشره بزياده مثل باقي الغسولات اللي جربتهم 
ويخلي البشره نظيفه ويتحكم بالدهون 
اما اللوشن فـ هو اكثر شي حبيته مادري شو الشي المميز فيه بس حبيته وايد وهو اكثر منتج استخدمته و يا الغسول

يكون طبقتين ترجينه وبعدين تحطينه ع البشره 
اما اخر منتج ف ماجربته صراحه فـ ماعرف كيف تأثيره 
و المجموعه خاليه من العطور 
هالخطوات الثلاث تحطينهم ورا بعض و يندمجون مع بعض يعني اول شي تغسلين بشرتج بعدين تحطين اللوشن على البشره تعطينه مجال شويه تمتصه البشره اخر شي تحطين التريتمنت 

؛ 
فالنهايه اتمنى هالتدوينه تفيدكم حتى لو شوي 
قلة التدوينات في الفتره اللي راحت لان كنت اعالج بشرتي فـ ما اقدر احكم على منتج في هالحاله 
خلصت العلاج من 5 شهور تقريبا فـ افكر اكتب عن تجربتي مع الروكوتان بس مثل ما تشوفون 
التدوينه طويله ف الافضل اكتبه في تدوينه منفصله ان شاء الله اذا الله قدرني 

في حفظ الله 

Leave a Comment Care