MAC HAUL | | مشترياتي من ماك

بسم الله الرحمن الرحيم 

صبـاح / مسـاء . . الخير ،
اتمنى تكونون بـ تمام الصحه و العافيه . .

 M A C . . H A U L  

من فتره طويله كنت افكر اطلب من موقع ماك بس كل مره اهون ما ادري ليش ! 

و اغلب المنتجات اللي اخذها من ماك كنت اطلبها من نوردستروم  لـ " سببين "

سعر المنتجات اقل من اسعارها فالمحلات عندنا و فوق هذا بعد كل فتره يزيدون الاسعار !

و لان اغلب المنتجات اساسا دايما خالصه يعني اذا حاطه في بالج كذا شغله بتطلعين بشغلتين او شغله 

طبعا انا من عشاق ماك و من الماركات اللي اول مابديت اشتري ميك اب كنت اشتري منها 

و ثاني فاونديشن استخدمته في حياتي كان منهم وكنت استخدمه لفتره طويله و يوميا و ما اذى بشرتي اكيد في بنات بيعارضوني وبيقولون طلع لهم حبوب من بشره لبشره يفرق في بنات ما اتقبلوه و في بنات تقبلوه و في وايد اشياء حبيتها من ماك غير الفاونديشن بس شي واحد اللي ماحبيته انهم 

كل فتره منزلين كوليكشن حالفين يفلسونا 

صراحه مب بالضروره انج تشترين كل كوليكشن ينزل لان احيانا مايكون في شي مميز غير العلب 

mac studio conceal and correct palette

هالكونسيلر كريمي فل كفر هو نفسه اللي يكون في علبه دائريه 

في منه 4 درجات لايت - ميديم - ميديم ديب - دارك 

الكونسيلر يتكون من 6 درجات متنوعه 4 درجات مختلفه من الكونسيلر للاندرتون البارد و الدافي و درجتين كوريكتر مناسبه لدرجات الكونسيلر الموجوده فالعلبه نفسها

و النمط نفسه في باقي ال3 درجات 4 درجات كونسيلر و درجتين كوريكتر 

وايد حبيت هالعلبه لانها تجمع بين كونسيلر و مصحح و عمليه تقدرين تشيلينها وياج افضل من انج تاخذين كذا شغله العلبه جدا عمليه تقدرين تستخدمينها مثل ماتبين لها وايد استخدامات 

كونسيلر ، كوريكتر ، كنتور ، هايلايت . . استخدميه مثل ماتحبين 

الدرجه اللي خذيتها ميديم 

سعره 40 دولار تقريبا 150 جذي و اتوقع اهني عندنا سعره فوق الـ 200 درهم ! شفتوا الفرق ؟

mac pro longwear concealer \\ كونسيلر برو لونق وير

هالكونسيلر متكلمه عنه من قبل تعبت وانا ادور عليه المره اللي قبلها كنت ماخذه اغمج ما كان مناسبني وايد و تعبت وانا ادور عليه و هذا اول سبب خلاني اطلبه اونلاين 

الكونسيلر تغطيته متوسطه لـ فل كفر و ثباته طوييل بطل نهايته مطفيه

الحلو انه في درجات متنوعه و في للاندرتون الدافي و البارد بس اكثر شي ما احبه فيه انه المنتج ماتقدرين تتحكمين فيه يعني اذا تحمستي و ضغطتي ع الضغاط بقوه بتطلع كميه كبيره ماتحتاجينه 

مع انه شكل العلبه و طريقة الضغاط حبيته بس المشكله في كمية المنتج اللي تطلع 

سعره فالموقع 21 دولار بما يعني تقريبا 70 وشوي درهم و اهني حول الـ 120 اتوقع 

اخر شي خذيته محددين whirl اكيد اكيد كلكم سمعتوا عنه و الكل يمدحه وقعت في غرامه عجيب 

و edge to edge نزل من فتره وكنت متردده اخذه ولا لا بس الحمدلله طلع اللون وايد حلوو 

طبعا محددات ماك احلى محددات بالنسبه لي 

soar - spice - half red 

هالثلاث الوان وايد احبهم و اكيد اضافه عليهم اللونين الجداد اللي خذيتهم واذا تبون بس اختيار واحد 

soar تقدرين تخلطينه ويا كل الالوان او تستخدمينه بروحه عجييب هاللون ما استغني عنه 

ستروب كريم وايد سمعت عنه و صراحه ابدا ماقريت عنه ذم بس ابدا مافكرت اني اشتريه 

لاني بشرتي دهنيه و اتوقع اني مابحبه لاني احب اللوك المطفي هذا المنتج تستر حجمه صغير وصلني ويا الطلب بس ماجربته للحين 

و خلصصصنا لاتنسون تشتركون بالمدونه 

Leave a Comment Haul