كيفية اختيار الفاونديشن المناسب ؟

Wednesday, June 3, 2015
بسم الله الرحمن الرحيم 
صبـاح / مسـاء . . الخير ،
اتمنى تكونون بـ تمام الصحه و العافيه . .




(( ملاحظه : قبل لا ابتدي بأي شي " انا بيوتي بلوقر و لست خبيرة تجميل اكتب بناءً على تجاربي الشخصيه " . . اختلافج فالراي معاي ليست مشكله ، لأن اللي يناسبني ممكن مايناسبج و العكس صحيح حتى لو كنا بنفس نوعية البشره  ))


بمناسبة قلة نشاطي في الفتره الاخيره بالتدوين هذي التدوينه عقاب لي خخخ و تعويض لكم
بتكلم عن الفاونديشنات و بما انه الفاونديشن " الاساس " يتعبر خطوه مهمه في المكياج بتكلم عن كل شي اعرفه عن الفاونديشن و الفاونديشنات اللي جربتهم و ماكتبت عنهم للحين راح ابتدي اكتب عنهم ، يمكن يكون شوي طويل بس اتمنى مايكون ممل . . 


(( نوعية بشرتي ))
 اتوقع انها من الزواحف 
دهنيه احيانا بشكل يضايق و ولما تصير مختلطه تكون بين الدهنيه و الجافه يعني منطقة التي زون تكون دهنيه و مناطق معينه تكون جافه !!


صوره توضيحيه لمنطقة الـ Tzone
وهي المناطق اللي تفرز دهون 




كيــف اختار الفاونديشن المناسب ؟

اول نقطه و قبل كل شي حطي في بالج انج تبين توحدين لون البشره اذا عندج تصبغات مثلا و تخلينها طبيعيه متناسق لون وجهج مع رقبتج ماتفتحينها او تغمجينها اكثر من درجه 
ده كان زمان لما كنا نحط فاونديشن افتح منا بمليون درجه 
 لا تختارين درجه افتح منج بوايد لانها راح تقلب رمادي 
و اذا ودج بلوك برونزي في وايد برونزات يا كثرهم بالسوق من ماركات رخيصه و غاليه 

في نقاط اساسيه قبل لا تاخذين الفاونديشن لازم تعرفينها 
( نوعية بشرتج ، اندرتونج ، مشاكل بشرتج و تغطية الفاونديشن ، لون بشرتج

1 - نوعية البشره : كلنا عارفين انواع البشره " دهنيه ، مختلطه ، عاديه ، جافه "
دايما صاحبات البشره الدهنيه و المختلطه يتوجهون للفاونديشن المطفي
و صاحبات البشره الجافه يتوجهون للفاونديشنات اللي تعطي لوك ديوي 
احيانا و ليس دائما اسم الفاونديشن يوضح هذا الفاونديشن مناسب لاي بشره و احيانا لا و في بعض البراندات يكتبون مثلا 
for dry skin - للجافه
for combination skin - للمختلطه 
oil free - للدهنيه

2 - اندرتونج : و هذا اللي متعب البنات و خلينا نكون صريحين مو الكل  يعتمده لما ياخذ فاونديشن بس هو عامل مساعد في اختيار الفاونديشن الصحيح و فعلا إذا الفاونديشن كان مو حلو عليج بعض البنات اللي مايعرفون الاندرتون ممكن يقولون الدرجه اللي خذيناها ماناسبتنا بس ممكن انتي تكونين مختاره درجه صحيحه بس اندرتون الدرجه ماناسبج 

الاندرتون فيه 3 اقسام : طالعي عروق ايدج
الدافي = اخضر او زيتوني . . الفاونديشن اصفر 
البارد =  ازرق ، بنفسجي . . الفاونديشن زهري
المحايد = بين الازرق و الاخضر و هذا الاندرتون يناسبهم كل شي الفاونديشن الزهري و الاصفر

هذا ابسط شي و اهم شي تعرفونه عن الاندرتون 
بعض الفاونديشنات من الاسم بتعرفين اذا هذا الفاونديشن اصفر او زهري و بعض الماركات 
يوضحونها ب حروف مثل C و W 
C = COLD , W = WORM 
بالاضافه لذلك .. راح تلاحظون الفاونديشن لونه على الزهري و الاصفر اذا ماشفتو هذا او هذا معناته الفاونديشن لونه محايد تقدرون تيبون ورقه او كلينكس اهم شي يكون لونه ابيض علشان يبين اندرتون الفاونديشن .
بس في ماك بنات لاتغلطون ماك عاكسين المفاهيم حرف الدبليو للاندرتون البارد و السي للدافي 

هذي الصوره توضح الالوان اللي تناسب الاندرتون الدافي و الالوان اللي تناسب الاندرتون البارد 



3 - مشاكل البشره و تغطية الفاونديشن : الفاونديشن في منه فل كفر و ميديوم و لايت من وجهة نظري انا اشوف للاستخدام اليومي حتى لو كانت عندج مشاكل بالبشره لا تستخدمين فاونديشن فل كفر حاولي تستخدمين كونسيلر او برايمر علشان تحلين المشكله طبعا على حسب المشكله شو محتاجه و استخدمي فاونديشن او بي بي كريم تغطيته تكون خفيفه يعطي لوك طبيعي اكثر 
اما المناسبات استخدميلها فاونديشن فل كفر علشان تعطي تغطيه اكبر و تخفي مشاكل البشره 

4 - لون الدرجه : اضائات المحلات جدا قويه ف يبين لون الفاونديشن مثل بشرتج و لما ترجعين البيت تنصدمين فـ عندج خيارين يا اما تجربين بالمحل على ويهج او تاخذين عينه من الفاونديشن 


بعد ما تعرفين هالشغلات الاساسيه عن الفاونديشن تقدرين تتجهين للبحث عن الاساس المانسب لج 
ممكن انتي تكونين ماتحبين تجربين فاونديشنات او ماعندج الميزانيه انج كل مره تشترين فاونديشن انصحج دائما قبل لاتاخذين فاونديشن كوني فكره عنه لاي بشره مناسب و كيف تغطيته و كيف ثباته ، اقري عنه ريفيوات اكثر بتعرفين هل هذا الفاونديشن المطلوب ولا لا لانه في كثير فاونديشنات فالسوق فـ جدا صعب انج تختارين واحد و انتي ماعندج فكره نهائيا ً عنه 
و لاتنسين تاخذين فكره عن الالوان اللي نازله كم درجه و  شو الدرجات اللي اندرتونها مناسب لج 
جذي بيكون الاختيار وايد اسهل لما تروحين المحل بتقولين لها وريني هالدرجه و هالدرجه ف بتكون الاختيارات اقل و الاختيار بيكون صحيح اكثر 


بحط لكم بعض روابط الفاونديشنات اللي تكلمة عنهم اهني بالمدونه 
و ان شاء الله بتكلم عن الفاونديشنات اللي ماتكملت عنهم قريبا .. 


Review : Foundation Studio Fix Fluid | | ريفيو : فاونديشن ستوديو فكس فلويد




وجذي نكون خلصنا اتمنى التدوينه تفيدكم حتى ولو بالقليل لاتنسون تشتركون بالمدونه . .  


1 comment:

  1. مشكورة علي الموضوع الرائع. اهتممت باختيارغسول للبشرة المختلطة ليعمل علي استعاده التوازن المثالي للزيوت والرطوبة مما يساعد في تغطية الفاونديشن لوجهي بشكل مثالي. فاستخدام غسول للبشرة المختلطة يعمل علي تهيئة البشرة جيدًا لاستقبال الفاونديشن.

    ReplyDelete

Top