جهاز شول لقدمين ناعمتين

بسم الله الرحمن الرحيم 

صبـاح / مسـاء . . الخير ،
اتمنى تكونون بـ تمام الصحه و العافيه . .

 اختفيييت فتره صابني كسل برمضان كل ما جيت بكتب تدوينه تكيسلت 

لانه من الضروري بالنسبه لي يكون في شويه كوفي على ككاو يعطي طاقه للتدوين 

اليوم اتنشطت لانه في شي جدا جميل جربته وقلت اقولكم عنه علشان تجربونه 

جهاز شول هو عباره عن مبرد إلكتروني للقدم يوعد ببشره ناعمه و جمليه بعد اول استخدام 

محتويات العلبه : 

- جهاز شول 

- 4 بطاريات ( الجهاز يعمل بالبطاريات )

- مبرد 

- غطاء حمايه

> > رايي بالمنتج < <

حبيت الجهاز لانه سهل الاستخدام و مافيه تعقيدات و هو بديل للمبرد العادي ، و فعلا من اول استخدام يعطيج بشره ناعمه ، قبل لاتستخدمينه غسلي ريولج و جففيها تماماً قبل استخدام الجهاز ولا تعرضين الجهاز للماي فقط المبرد تشيلينه و تغسلينه و بعد ماينشف ترجعينه ، تمررين المبرد على الجلد الميت و بتلاحظين بودره بيضا تطلع هذا الجلد الميت 

نقطه سلبيه . . (  الصوت بالنسبه لي كان مزعج شوي  )

صراحه المنتج وايد سهل علي التعب و انا اقعد افرك ريولي بالمبرد العادي هذا ابدا ماتحسين بأنج تبذلين جهد و تحصلين نتيجه روعه وانتي يالسه فالبيت بدل لاتروحين الصالون 

الجهاز يقدر يستخدمه اكثر من شخص لان اشوف سعره شوي مرتفع بالنسبه لمبرد بس صراحه يستاهل بس اخذو لكم اكثر من مبرد كل شخص يستخدم المبرد الخاص فيه و طريقة تبديل المبرد جدا سهله مافيها تعقيد و الجهاز متوفر في الصيدليات وهذا احلى شي يعني مايحتاج تطلبينه من التاجرات

ملاحظات بسيطه ، 

- الجهاز فقط مخصص للريول ولا تحاولون تستخدمونه لاي منطقه ثانيه .

- مايصلح لمرضى السكري و الاشخاص اللي يعانون من فقر الدوره الدمويه .

اذا حسيتي المبرد بدا يفقد فاعليته بعد ماتستخدمينه اكثر من استخدام اشتري فقط المبرد 

( و عن طريق هذا الزر اللي بالصوره تقدرين تشيلين القديم و تحطين الجديد )

. . 

هذا موقعهم للي حاب يطلبه و بعد تحصلونه في الصيدليات سعره بحدود ال 200 

http://www.schollvelvetsmooth.com/

" و بما انه تكملنا عن شي يخص الاقدام خل اكملها و اتكلم عن بعض المنتجات اللي استخدمها "

 (( سبراي للقدمين " سبراي بيدي " ))

انا استخدمه كـ اخر خطوه قبل المرطب بس اهو مكتوب عليه اول خطوه للبديكير يسخدم للعنايه بالاقدام و اظافرها و هو عباره عن سائل مطهر يحتوي على مادة التريكلوزان ماده كيميائيه 

للقضاء على البكتيريا و الميكروبات و الجراثيم في القدمين قبل عملية البديكير 

هالسبراي منعشش يعطي استرخاء للقدمين ( بالنعناع و زيت الاوكاليبتوس )

سعره 37 درهم من نزيه 

(( الملح الصخري للقدمين "روك سولت" ))

من نفس مجموعة السبري بالنعناع و الاوكاليبتوس و يستخدم كـ ثاني خطوه 

 هو عباره عن ملح صخري سريع الذوبان و غير رغوي يستخدم في حمامات معالجات القدمين

  يتكون من ملح البحر الميت الصخري ، يعتبر زيت الاوكاليبتوس مطهرا قويا و مقاوما للفيروسات بينما يعمل زيت النعناع على حماية البشره من الالتهابات و يساعد على استرخاء العضلات 

طريقة الاستخدام :

تضيفين في وعاء ماء دافي و كميه صغيره من الملح الصخري تقريبا الكميه اللي تنحط بما يقارب حجم غطاء العلبه مش اكثر ، بعدها نقلب السائل على ما يذوب الملح الصخري بالكامل وبعدها ننقع رجولنا في الوعاء لمدة عشر دقائق 

# يمنع الافراط في استخدام هذا المنتج 

سعره 55.50 درهم من نزيه 

في خطوه ثالثه و هو عباره عن معالج الاجزاء المتيبسه من الجلد بس مادري ليش ماخذيته !! 

(( سكراب هيمالايا للاستخدام اليومي ))

يحتوي على الجوز و الاناناس و جوز الهند

حبيبات الجوز و مستخلص الاناناس تقشر القدمين و تتخلص من الخلايا الميته

و الالوفيرا و جوز الهند معروفين ينعمون و يرطبون القدم

ريحته جمييله و تقشيره حلو كـ يومي يقشر الخلايا الميته و يعطي ترطيب خفيف للقدم يعني ضروري تحطون بعده مرطب لان ترطيبه مش قوي

من الصيدليه او الجمعيه ما اتذكر سعره 

(( مرطب جرجنز للقدم ))

تكلمت عنه من قبل اهني بالمدونه انا افضله صراحه اكثر من اللي خذا ضجه من بوتس ترطيبه جدا عادي هذا ترطيبه احلى و استخدمه على طول 

من الصيدليه او الجمعيه و سعره 13 درهم

تقدرون بعد تشوفون هالتدوينه تكلمت فيها عن معالج لتشققات الرجل 

هنا

Leave a Comment Care